Tempo Semanal

Deskonfia PNTL Rezolve Problema CPD ho Violencia Featured

Rate this item
(3 votes)
Ne'e maka haree ne'ebe governu hakarak sosa agora maibe CPD-RDTL dehan sira so fa'an kuandu koileta ona. Governu ho CPD-RDTL falha hetan akordu PNTL sasurut CPD sai husi Welaluhu Ne'e maka haree ne'ebe governu hakarak sosa agora maibe CPD-RDTL dehan sira so fa'an kuandu koileta ona. Governu ho CPD-RDTL falha hetan akordu PNTL sasurut CPD sai husi Welaluhu

CPD-RDTL alega katak PNTL involve iha baku, tuku, tebe membru CPD nain sanplu liu nune’e mos membru PNTL sira mos involve iha sunu no estragus, uma barakas ne’ebe uluk harii husi membru CPD-RDTL wainhira hahu ba halo kooperativa iha welaluhu desde fin ano 2012. Tuir CPD mos alega katak PNTL hamutuk ho komunidade balun halo estragus ba produtu balun ne’ebe sira kuda hela iha ne’eba.

 


PNTL Hamoos ona Membru CPD-RDTL (conselho popular de Defesa-Republika Demokratika de Timor Leste) husi welaluhu hodi tula iha karreta lori fila on aba ida-idak ninia distritu. Tuir observasaun ate segunda no Tersa atividade tula hikas membru CPD-RDTL ba distritu balun iha Timor leste sei kontinua no husi Atauro ho Oekuse ninian mai hamutuk iha estasaun PNTL Kaikoli antes arangka ba sira nia fatin.


Iha Kuarta (20/03) Gill Fernandes informa ba Tempo Semanal Online katak PNTL sira tula membru CPD-RDTL sira sai hotu ona husi Welaluhu no alega mos katak PNTL mos involve iha sunu barakas no lere hotu batar no ai horis ne’e CPD-RDTL sira kuda iha area ne’eba.


“PNTL la’o uluk depois akomapnia ho juventude sira ba lere mos hotu hahan sira hanesan batar, lakeru no sasan sira seluk, lere mos hotu,” dehan Gill.
Nia hatutan katak, “Barakas sunu balun no balun sira sobu I hahan sira lere mos hotu. Ne’e halo husi, “Polisia sira ho komunidade ka jovens sira iha fatin ne’eba.”


Gill hateten katak membru CPD-RDTL iha Welaluhu daudaun ne’e hetan terror maka’as husi parte balun. “Sira hela iha ne’eba, ameasa ami nia emar sira iha cede-cede sira ne’ene. Hela iha ne’eba sira ameasa ami nia responsavel sira no ameasa atu sunu cede sira ne’ebe espaliada iha ne’eba.”

Maske welaluhu mamuk ona maibe Bekoo suai membru CPD-RDTL sei lere nafatin duut hodi halo natar. Maske iha ne'eba grupu reefere kuda ona haree hetares liu sanolu resin ida maibe iha indikasaun katak sira mos sei infrenta hela akuzasaun husi ema seluk iha parte refere.


Problemas CPD-RDTL ne'e iha dezde 2000 maibe too ohin estadu Timor Leste la iha nafatin kbiit atu bele rezolve problema CPD-RDTL. Maibe tuir eis gerileiru balun katak problemas CPD-RDTL ne'e ninia hun mai husi krize balun ne'ebe mosu durante prosesu funu ba libertasaun nasional.


“Problema CPD-RDTL ne’e bele resolve so liu husi dalan dialogu ida. Dialogu Nasional. Ne’ebe hatudu mai ita katak konflitu politika ne’e mai husi 1975, 1984 to’o 1989,” dehan Eis gerileiru Aquito ne’ebe daudaun ne’e membru Policia Militar F-FDTL.


Iha ekipa F-FDTL ida ne’ebe durante ne’e monitoriza situasaun CPD-RDTL iha welaluhu ne’ebe konsege halo ona esforsu balun atu halo parte komunidade ho CPD-RDTL atu tuur hamutuk buka solusaun ba sira diferencias liu husi dalan dialogu.


Eis komandante gerilha ne’ebe sempre la’o iha area fatuberlihu to’o alas no aileu ninian ne’e hateten katak, “iha dialogu ne’e so ema ne’ebe forte maka bele rezolve problema sira nian.”


CPD-RDTL ho iniciativa halo ona kooperativa maibe problema sira nian maka la iha kuinesimentu husi lider komunitariu sira nune’e obrigatoriamente sira husik hela ona natar hetares lubun ne’ebe sira konsege kuda ona. Durante fulan Novembru ate Marcu ne’e CPD-RDTL konsege halo bu’at balun ne’ebe ema barak ohin labele halo.


“Ha’u hanoin CPD-RDTL ninia atuasaun ne’e pozitivu tebes tan ba sira bele mobiliza ema barak liu fali governu no hatudu izemplu ba nasaun kona ba servisu grupu.” Dehan Marcal da Silva, Estudante ida husi Universidade ida iha Dili.


“Maibe kala Governu mos mo’e tan ba sira falha sosa tratores mas la konsege mobiliza tratores sira ne’e ba halo natar entaun sira tenke ba hasai obrigatoria husi welaluhu se lae governu moe bo’ot tan ba gasta osan maibe rezultadu lakon ho grupu CPD-RDTL,” nia haktuir.

Antes ne'e iha fin do semana kotuk, Presidenti da Republika Taur Matan Ruak dehan ona katak problema CPD-RDTL bele rezolve la'os ho violencoa mas iha atuasaun membru PNTL sira uza meus ne'ebe kontraria ho hanoin Presidenti Taur Matan Ruak ninian.

Last modified on
Tempo Semanal

Ho hakraik an Tempo Semanal hato'o komprimentos ba laitor sira katak, Jornal Tempo Semanal hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Semanal, bandu atu hetan envelope ka sasan ruma husi fontes informasaun sira.

Website: www.temposemanal.com

Media

Copyright © 2014 Agora Tempo Intermedia Ltd. All Rights Reserved.
Online since February 01, 2013

Top Desktop version